Loðnuveiðar með flotvörpu hófust norður af landinu síðdegis á miðvikudaginn. Veiðarnar skiluðu litlum árangri á miðvikudag og nóttina þar á eftir og kom það mönnum á óvart.
Skipin voru í ágætis lóði en líkur eru á að verulegur hluti þess sé áta. Þegar trollin eru tekin eru þau kafloðin af átu. Loðnan virðist vera dreifð og þess vegna skila holin litlu. Í gærmorgun var Börkur NK búinn að hífa tvisvar og fá 60-70 tonn í hvoru holi eftir að hafa togað í 7-8 tíma. Bjarni Ólafsson AK var búinn að hífa einu sinni og fékk 90 tonn.
Önnur skip voru að fá á bilinu 60-120 tonn, allt eftir því hve lengi var dregið. Að sögn skipstjórnarmanna virðist ekki vera neitt göngumynstur á þessari loðnu. Hún er búin að vera þarna nokkuð kyrr um skeið en hefur þó sigið örlítið í austur. Bátarnir hafa ekki orðið varir við alvöru loðnugöngu ennþá.
Loðnan sem veiðst hefur virðist vera nokkuð misjöfn að stærð. Í fyrra holi Barkar voru 39 stykki í kílói en í holinu hjá Bjarna Ólafssyni voru 47 stykki í kílóinu.
Skipstjórnarmennirnir, sem heimasíðan Síldarvinnslunnar ræddi við í gærmorgun, voru bjartsýnir á loðnuvertíðina þrátt fyrir þessa rólegu byrjun. Bent var á að loðnan hefði oft verið heldur erfið viðureignar á þessum árstíma en síðan hafi ræst úr. Einnig var bent á að enn hefðu engar veiðar farið fram í dagsbirtu og mögulegt væri að þær verði árangursríkari.
