Eyjapeyinn Hlynur Andrésson er á meðal helstu íþróttamanna þjóðarinnar
Hann keppir í langhlaupum og hefur verið iðinn við að setja Íslandsmet að undanförnu. Hlynur er nú handhafi Íslandsmeta í tíu vegalengdum, frá 3.000 m hlaupi og upp í maraþonhlaup.
Útgerðarfélagið Bergur-Huginn í Vestmannaeyjum tók ákvörðun um að styrkja Hlyn og stuðla að því að hann geti helgað sig íþrótt sinni. Sl. laugardag fór hið árlega götuhlaup Vestmannaeyja fram og í tengslum við það undirrituðu Hlynur og Arnar Richardsson, rekstarstjóri Bergs-Hugins, styrktarsamning.
Í styrktarsamningnum má lesa eftirfarandi: „Tilgangur þessa styrktarsamnings er að gera Hlyni kleift að einbeita sér að því að stunda sína íþróttagrein án utanaðkomandi truflana í því skyni að ná markmiðum sínum og standa straum af nauðsynlegum útgjöldum vegna uppihalds og ferðalaga í tengslum við næstu þrjú ár eða fram yfir Olympíuleikana í París árið 2024 en Hlynur hefur sett sér það markmið að ná lágmarki fyrir maraþon á leikunum.“
Það verður svo sannarlega spennandi að fylgjast með Hlyni á næstu árum og er honum hér með óskað velfarnaðar.
Greint er frá þessu á facebooksíðu Síldarvinnlsunnar. Forsíðumynd: Tói Vídó
