27.10.2020
Hjúkrunar-og dvalarheimilið Hraunbúðir auglýstu fyrir hálfu ári síðan í fyrstu bylgju Covid 19 eftir einstaklingum til að skrá sig í bakvarðarsveit fari svo að brottfall verði í hópi starfsmanna vegna sóttkvíar eða einangrunar.
Sem betur fer höfum við ekki þurft á því að halda að kalla út fólk því við höfum sloppið vel, hingað til.
Okkur er þó brugðið við fréttir helgarinnar um hópsmit á stofnunum sem viðkvæmir einstaklingar dvelja á.
Við vitum að lítið þarf út af að bregða til að veiran læði sér á eyjuna okkar og viljum endurvekja skráningar í okkar eigin bakvarðarsveit.
Við leitum að heilsuhraustum einstaklingum sem gætu aðstoðað við umönnunar, eldhús og ræstingarstörf.
Sjúkraliðar, hjúkrunarfræðingar og þeir sem reynslu hafa af störfum við aðhlynningu eru sérstaklega hvattir til að skrá sig.
Laun yrðu greidd skv kjarasamningum þeirra starfsstétta sem um ræðir.
Þeir sem hafa áhuga og möguleika á að ganga til liðs við okkur sendið nafn, símanúmer og upplýsingar um hvaða starfi þeir gætu sinnt ef á þyrfti að halda, á hraunbudir@vestmannaeyjar.is eða í síma 860 1030.
Ef þörf verður á að kalla eftir aðstoð mega þeir sem skrá sig eiga von á símtali.
Frétt frá heimasíðu Hraunbúða
