Bæjarráðs Vestmannaeyja fundaði í dag og tók fyrir viðauka við fjárhagsáætlun Vestmannaeyjabæjar fyrir árið 2019
Bæjarráð tók fyrir viðauka við fjárhagsáætlun Vestmannaeyjabæjar fyrir árið 2019. Samkvæmt viðaukanum eykst heildarfjárfesting samstæðu Vestmannaeyjabæjar um 98 m.kr. Á árinu 2019 samþykkti bæjarráð og framkvæmda- og hafnarráð nýjar fjárfestingar og framkvæmdir fyrir alls 108,5 m.kr., þar af 55 m.kr. til viðgerða á þaki Íþróttamiðstöðvar og 40 m.kr til viðgerða á stálþili á Friðarhafnarkanti. Vegna tilfærslna milli fjárfestingarverkefna hjá samstæðu Vestmannaeyjabæjar nægir að hækka heildarfjárfestingar ársins um 98 m.kr.
Í rekstri B-hluta samstæðu Vestmannaeyjabæjar er viðauki sem er tilkominn vegna þess að rekstur Náttúrustofu Suðurlands fór yfir til Vestmannaeyjabæjar á árinu 2019. Rekstrarafgangur Náttúrustofunnar eykur afkomu samstæðunar um tæpar 4,9 m.kr. frá upphaflegri áætlun. Ennfremur eru gerðar leiðréttingar á tekju- og gjaldamillifærslum á milli stofnana bæjarins en þær hafa engin áhrif á rekstrarafgang bæjarsjóðs.
Bæjarráð samþykkir fyrirliggjandi viðauka við fjárhagsáætlun ársins 2019.
