17.02.2020
Í hádeginu í dag var farið yfir afleiðingar vegna óveðursins síðastliðin föstudag.
Aðfaranótt 14. febrúar síðastliðin var aðgerðarstjórn Almannavarna virkjuð vegna óveðurs sem gekk yfir Eyjarnar um nóttina.
Afleiðingarnar af óveðrinu voru meðal annars þær að bilanir urðu á rafmagnsflutningum Landsnets og rafmagn keyrt á varaafli allan föstudaginn og hluta laugardagsins.
Raforkunotkun heimila er 5-6 MW yfir vetratímann. Þegar full vinnsla er í fiskvinnslustöðvunum og verið er að frysta til dæmis loðnuafurðir er notkunin um 13 MW.
Þar sem aðeins rúm 4 MW eru til staðar sem varaafl í Eyjum, gefur augaleið að alvarlegt ástand getur myndast ef alvarleg bilun verður í flutningskerfi Landsnets á Suðurlandi. Atvinnulífið mun enga raforku fá og einnig þarf að skerða eða skammta raforku til heimila.
Töluvert tjón varð í tengslum við óveðrið. Eftir er að taka saman og greina kostnað vegna foktjóns.
Málefni Blátinds, sem losnaði úr stæði sínu og sökk í höfninni, verða tekin fyrir á fundi framkvæmda- og hafnarráðs sem haldinn verður á morgun.
Bæjarráð tekur undir með Almannavarnarnefnd Vestmannaeyja sem á fundi sínum þann 7. febrúar síðastliðnum, lýsti þungum áhyggjum af stöðu varaafls í Vestmannaeyjum.
Bæjarráð felur bæjarstjóra að óska eftir fundi fulltrúa Landsnets og HS veitna, með atvinnulífinu og bæjarstjórn, til að upplýsa um ástandið og ræða næstu skref og aðgerðaáætlun til að bæta stöðu varaafls í Vestmannaeyjum.
