Á bæjarráðsfundi síðasta þriðjudag fór Íris Róbertsdóttir bæjarstjóri yfir þær jákvæðu fréttir að í lok síðustu viku hefði Hafrannsóknastofnun lagt til að hámarksafli loðnu fyrir fiskveiðiárið 2021/2022 yrði 904.200 tonn.
Tillaga stofnunarinnar um hámarksafla í loðnu hefur ekki verið hærri frá árinu 2003. Í hlut Íslands koma rúm 662 þúsund tonn sem er hátt í tíu sinnum meira en síðasta vetur þegar kvóti Íslendinga var um 70 þúsund tonn
Rúmlega 30% af loðnukvótanum á Íslandi er hjá útgerðum í Vestmannaeyjum. Þessi tillaga hefur því mikil áhrif á tekjur fyrirtækja og starfsfólks hjá uppsjávarútgerðum og tengdum greinum, sem og allt samfélagið í Vestmannaeyjum.
Bæjarráð fagnar því að allt stefni í stóra loðnuvertíð. Vægi loðnuveiða er mikið fyrir samfélagið eins og fram kom í skýrslu um áhrif loðnubrests, sem unnin var fyrir Vestmannaeyjabæ árið 2020. Fyrir þjóðarbúið í heild sinni eru þetta afar jákvæðar fréttir.
