Þeir voru yndislegir tónleikarnir í Eldheimum á laugardaginn þar sem söngvararnir Silja Elsabet Brynjarsdóttir og Þórarinn Ólason leiddu saman hesta sína. Ekki var síður gaman að kíkja á sýningu Viðars Breiðfjörðs í Einarsstofu í Safnahúsi. Viðar var Bæjarlistamaður Vestmannaeyja á síðasta ári og tók Silja Elsabet við kyndlinum þetta árið. Ber Viðar nokkra ábyrgð á því. „Ég vaknaði klukkan fimm einn morguninn á afmælis- og Goslokahátíð okkar
Vestmannaeyinga í fyrra,“ sagði Viðar þegar þau hittust í hléi í tónleikunum. „Sólin skein. Það var yndislegt veður og fuglasöngur úti. Ég Bæjarlistamaður og búinn að selja heila sýningu á stuttum tíma. Labbaði niður í bæ og hitti unga og fallega stúlku, hana Silju Elsabetu og sleppti henni ekki fyrr en hún var búin að lofa mér að sækja um að verða Bæjarlistamaður Vestmannaeyja á næsta ári. Hún sótti um og fékk, verðskuldað og á eftir hitti ég þær mæðgur, Silju Elsabetu og Ragnheiði, mömmu hennar sem voru eitt sólskinsbros. Það var ánægjulegt því við eigum svo mikið af efnilegu, yndislegu
ungu tónlistarfólki hér í Vestmannaeyjum sem á eftir að fá að njóta sín í lífinu,“ sagði Viðar sem var ánægður með aðsókn á sýninguna. „Ég get ekki kvartað.“ Tónleikarnir í Eldheimum voru vel sóttir og kunnu gestir svo sannarlega að meta það sem fram var borið. Silja Elsabet er ein af okkar efnilegustu söngkonum og á sól hennar eftir að skína skært. Tóti er reynslubolti mikill og saman nutu þau þess að skemmta fólkinu. Lagavalið var fjölbeytt og úr varð mikil tónlistarveisla krydduð skemmtilegum sögum.
Þriðjudagur 30. maí 2023
