18.03.2020
Vinir,
Ég er veikur af covid-19 og er í einangrun heima hjá mér út mars. Ég hef það fínt og er það heppinn að veiran fer ágætlega með mig. Ég finn þannig séð ekki fyrir neinu og sinni vinnu hér heima eins og hægt er. Sömu sögu er að segja af pabba, hann er ferskur í dag og hress. Aðrir í fjölskyldunni eru veirulausir en í sóttkví.
Ég hef aðeins orðið var við ótta í mínu nærsamfélagi sem ég skil vel. Það er afar eðlilegt að við óttumst ástandið og afleiðingar þess en eftir að hafa fylgst með framvarðarsveitinni í töluverðan tíma á daglegum fundum, og nú fengið að kynnast fólkinu á bak við tjöldin, er ég mikið rólegri.
Ég er búinn að fá símtöl frá þremur læknum, þremur hjúkrunarfræðingum og tveimur lögreglumönnum ásamt því að hafa verið í tölvupóstsamskiptum við rakningateymið. Vissulega eru þau að kanna stöðuna á mér heilsufarslega en aðallega eru þau að reyna að rekja smitleiðir og koma í veg fyrir að smit berist áfram. Það er hersveit af sérfræðingum að reyna að finna út úr því hvar ég hafi smitast og það er hersveit að vinna í því að smitið berist ekki áfram m.a.með því að setja mig í einangrun, og þá sem ég hef verið í samskiptum við á ákveðnum tíma í sóttkví.
Þetta er ótrúlega öflugt teymi sem vinnur af þvílíkri fagmennsku og einurð.
Það er ekki þannig að einhver sem hitti einhvern sem hitti mig í seinustu viku þurfi að hætta sinni daglegu rútínu og fara í sóttkví. Það er ekki þannig að vinir vina minna þurfi að hætta að umgangast vini sína sem hittu mig. Foreldrar barna sem eru vinir barna vina minna, hvort sem vinir mínir eru í sóttkví eða ekki, þurfa ekki að grípa til neinna annarra ráðstafanna en mælt er með hér, sem eru þær sömu og allir aðrir eiga að fylgja – https://www.covid.is/flokkar/fordast-smit.
Teymið á bak við tjöldin sér um þetta og setur þá í sóttkví sem það telur þurfa í sóttkví, aðra ekki. Höldum áfram að fara varlega og förum eftir ráðleggingum sérfræðinganna og hlustum á það sem frá þeim kemur. Ég trúi að þá birti fljótlega.
Kveðja,
Arnar í einangrun
Þetta er birt með leyfir frá Arnari en hann skrifar þetta á facebooksíðu sina í dag.
