Annar sunnudagur í aðventu sýnir okkur Herjólf 1 liggja við bryggju.
Árni Finnbogason (1893-1992) frá Norðurgarði gerði þetta skemmtilega málverk sem vafalaust kemur mörgum kunnuglega fyrir sjónir.
Það er enda ekki að undra þar sem samskonar málverk hékk og hangir raunar enn í Herjólfi III og er beint á móti landganginum þar sem gengið er í land í Eyjum. En það sérkennilega er að málverkið sem Eyjamenn og gestir hafa barið augum í Herjólfi III er eftirmynd af þessari úr safni Listasafnsins.
Hér er sem sagt frummyndin af þeirri sem Eyjamenn og gestir hafa svo lengi haft fyrir augum áður en núverandi Herjólfur hóf siglingar. Raunar virðist svo vera að óvenju algengt hafi verið að gera eftirmyndir af málverkum Árna.
Í Listasafninu eru 6 frummyndir eftir Árna en 14 eftirmyndir. Hversu oft ætli eftirmynd að málverki eftir Árna hafi verið tekin fyrir frummynd og ætli það hafi verið svo með eftirmyndina í Herjólfi III?
