19.08.2020
Nú er sektað vegna grímuskyldu hér á landi og nema sektirnar á bilinu 10 til 500 þúsund króna. Ríkissaksóknari hefur gefið út uppfærð fyrirmæli um brot gegn sóttvarnarlögum.
Ríkissaksóknari hefur gefið út ný og uppfærð fyrirmæli um brot gegn sóttvarnarlögum og reglum settum samkvæmt þeim.
Í þessum fyrirmælum, sem leysa af hólmi fyrirmæli ríkissaksóknara sem tóku gildi 27. mars síðastliðinn bætast við sektarheimildir vegna brota sem tengjast 2ja metra reglunni og reglum um grímunotkun.
Brot á reglum um notkun andlitsgrímu fyrir forsvarsmenn/skipuleggjendur þeirrar starfsemi eða samkomu sem um ræðir getur varðað 100 til 500 þúsund króna sekt. Sekt einstaklings sem notar ekki andlitsgrímu getur varðað 10 til 100 þúsund króna sekt. Sektin ákvarðist eftir alvarleika brots. Grímuskyldan á til dæmis við í almenningssamgöngum, á hárgreiðslustofum og starfsemi sem krefst nálægðar.
Brot gegn skyldu til að hægt sé að tryggja 2 metra á milli einstaklinga sem ekki deila heimili er sú sama og gildir um brot á reglum um notkun andlitsgrímu og ákvarðist sektin eftir alvarleika brots. Sektarheimild nær einungis til fyrsta brots.
Ef brotið er á reglum um fjöldatakmörkun á samkomum er sekt einstaklings sem sækir samkomuna 50 þúsund krónur. Sekt forsvarsmanns/skipuleggjanda sem stendur fyrir samkomu varðar 250 til 500 þúsund krónur. Sektarheimild nær einungis til fyrsta brots forsvarsmanns/skipuleggjanda.
Í nýju fyrirmælunum segir að ríkissaksóknari leggi áherslu á að ákærendur meti hvert tilvik fyrir sig og ákvarði sektarfjárhæð með hliðsjón af alvarleika brots enda sé ljóst er að brotin geta verið afar mismunandi og þar með mis alvarleg.
Frétt frá frettabladid.is
