13.02.2020
Al-Arabi varð í dag fyrsta liðið til að komast í undanúrslit í Ooredoo deildabikarkeppninnar í Katar. Þýski sóknarmaðurinn Pierre-Michel Lasogga skoraði eina markið á 5. mínútu þegar Al-Arabi vann Al Wakra.
Tígull heyrði í Heimi og fékk að forvitnast hvað væri framundan en eins og flestir vita þá er Heimir Hallgrímsson þjálfari Al-Arabi og þá leikur Aron Einar Gunnarsson landsliðsfyrirliði með liðinu. Aron lék allan leikinn í dag.
Al-Arabi mætir annað hvort Al Rayyan eða Al Khor í undanúrslitum en það skýrist á laugardaginn þegar þau lið hafa lokið leik.
Þann 8.febrúar síðastliðinn spilaði Al-Arabi í Amir Cup bikarkeppninni en sá leikur endaði með 2 – 2 jafntefli. Farið var beint í vítaspyrnukeppni sem endaði 10-9 fyrir Al-Arabi. Aron Einar skoraði úrslitamarkið og er því Al-Arabi komið í 8 liða úrslit. Það verður dregið í Amir Cup næstkomandi sunnudag og til fróðleiks þá fá Bikarmeistarar í Amir Cup sæti í Meistaradeild Asíu svo það er til mikils að vinna.
Myndir frá einkasafni Heimis og Arons eru birtar með leyfi frá þeim.
