21.08.2020
Vegna þeirrar stöðu sem uppi er í samfélaginu um þessar mundir hefur verið ákveðið að 240 ára afmælishátíð Landakirkju, sem til stóð að yrði 30.ágúst næstkomandi, muni falla niður. Undirbúningur fyrir hátíðina hefur staðið yfir um nokkurt skeið, og líklega hafa bæjarbúar einna helst orðið varir við andlitslyftinguna á veggnum umhverfis kirkjuna, auk þess sem verið er að reisa nýjan vegg að vestanverðu (við Vallargötu).
Það er ljóst að kirkjustarfið þarfnast svolítillar aðlögunar vegna kórónaveirunnar, og um þessar mundir eru fermingar á fullu í Landakirkju, þó með breyttu sniði miðað við það sem gengur og gerist. Fjöldatakmarkanir eru í athöfnunum og tveggja metra reglan er einnig höfð í hávegum, auk þess sem engar altarisgöngur eru í kirkjum landsins.
Fermingarfræðsla fyrir 2007 árganginn mun hefjast seinna í haust en venjulega og munu prestarnir fá að koma skráningarblöðum í skólann ásamt nánari upplýsingum um veturinn framundan.
Kv. Guðmundur Örn Jónsson og Viðar Stefánsson
