03.05.2020
Áður tíðkaðist að nánast allir sem sóttu um sumarstarf hjá Vinnslustöðinni í Vestmannaeyjum fengju vinnu og hefur þurft að sækja mannskap til þess að uppfylla þörf fyrirtækisins. Þessi staða hefur heldur betur breyst og sóttu nú 150 einstaklingar um sumarstarf hjá Vinnslustöðinni, en aðeins 30 voru ráðnir til starfa, segir í svari Lilju Bjargar Arngrímsdóttur, yfirmanns starfsmannamála fyrirtækisins, við fyrirspurn 200 mílna.
Vinnslustöðin auglýsti til umsóknar sumarstörf fyrir páska og rann fresturinn út 27. apríl. „Af reynslu fyrri ára þá var ákveðið að auglýsa eftir umsóknum svo við gætum betur áttað okkur á því hvernig við gætum mannað vinnsluna ef ekki fengjust nægar umsóknir í tíma. Undanfarin ár má segja að allir þeir sem hafi sótt um hafi fengið hjá okkur vinnu,“ segir Lilja Björg.
Færri stöður vegna óvissu
Þá var óskað eftir því að starfsmenn myndu leggja fram sumarleyfisóskir sem hún segir vanalega vera allmargar, en það sé ekki tilfellið í ár og því hafi verið ráðið í færri stöður en undir venjulegum kringumstæðum.
„Ástandið í heiminum gerir það hins vegar að verkum að fólk getur illa skipulagt sín sumarfrí. […] Við erum með marga starfsmenn sem eru af erlendum uppruna og fara margir til sinna heimalanda hluta úr sumri. Nú horfir hins vegar svo til að þeir hafa ekki tök á að skipuleggja nein ferðalög og því bárust fáar sumarleyfisóskir þegar óskað var eftir þeim,“ útskýrir Lilja Björg. Þá hafi einnig haft áhrif að breyta hafi þurft starfsemi vinnslunnar til þess að aðlaga framleiðsluna að aðstæðum.
„Í ár fengum við yfir 150 starfsumsóknir um sumarvinnu en aðeins voru ráðnir inn um 30 sumarstarfsmenn og voru þeir allir ráðnir á vaktir í uppsjávarvinnsluna. Undanfarin 2-3 ár hafa þetta verið um 40-50 starfsmenn sem við höfum ráðið inn á sumrin og eins og áður segir hafa nær allir fengið vinnu sem sótt hafa um og oft höfum við þurft að sækja mannskap þar sem umsóknir dekkuðu ekki þörfina hjá okkur sérstaklega áður en við tókum nýtt uppsjávarfrystihús í gagnið.“
