Hann Kolli hefði orðið 30 ára í dag hefði hann fengið að lifa með okkur áfram, hann á risastóran flottan vinahóp sem heldur minningu hans vel lifandi. Kolli var alltaf hrókur alls fagnaðar og því vel við hæfi að fagna þessum merkisdegi hans. Vinahópurinn hittist í morgun við leiðið hans og skáluðu honum til heiðurs og voru þau búin að útbúa flottan grip sem var settur á leiðið hans í morgun.
Svo kl 11:30 var súpa og brauð heima hjá Laufeyju og Eyþóri en Laufey var ósjaldan með súpu fyrir leiki og allt liðið mætti og naut þess vel, Kolli var mikill matmaður og fékk hann iðulega góðan skammt með sér heim í nesti fyrir næsta dag.
Kl 13:30 verður athöfn í stóra salnum í íþróttamiðstöðinni og væri gaman að sjá sem flesta. Kolli var eitt af andlitum handboltans í Eyjum og átti mjög stóran þátt í þeirri uppbyggingu sem deildin gekk í gegnum og kom liðinu á þann stað sem það er í dag. Hann spilaði 279 leiki fyrir félagið og skoraði 2 mörk. Honum til heiðurs mun vinahópurinn vígja mynd af honum Kolla okkar. Einnig verða 100 blöðrum sleppt en á þær verður hægt að skrifa kveðju til kappans. Allir eru velkomnir sem vilja minnast yndislegs drengs.
Það verður dagskrá hjá þessum flotta vinahóp í allan dag, um kl 15:00 verður bjór-pub-quiz á Ölstofa The Brothers Brewery
Svo í kvöld verður veisla í AKÓGES þar sem vinahópurinn og aðstandendur munu fagna að hætti Kolla.
Hérna eru nokkrar myndir frá hádegismatnum.
